Тироидните нарушувања се многу чести, и тоа особено кај жените. Можат да се појават во било која возраст. Иако ова нарушување не се смета за болест, туку за сосотојба, сепак симптомите како замор, зголемување на тежината, анксиозност и дигестивни тегоби можат значајно да влијаат на секојдневното функционирање.

Соодветната терапија, суплементацијата, правилната исхрана и физичката активност можат да ги подобрат симптомите и да го подобрат квалитетот на живот.

Не постои "магична" исхрана што може да го реши проблемот, но одредени нутритивни промени како исхрана без глутен или без лактоза, често покажуваат добри резултати кај многу пациенти. Вреди да се проба и внимателно да се набљудува како телото реагира, затоа што токму тие мали прилагодувања некогаш можат да донесат голема разлика.

Целта на оваа едукација е да ви помогне да го разберете подлабоко влијанието на тироидната жлезда врз метаболизмот, важноста на одредени суплементи и улогата на храната во целиот процес.

Не се работи за следење на строг план, туку за стекнување знаење кое ќе ви овозможи да правите паметни нутритивни избори кои ќе бидат долгорочно прилагодени на вашата сосотјба.

Во прилог следуваат три седумдневни менија со балансирани и разновидни оброци, креирани според насоките и препораките објаснети погоре. Секое мени е посебно прилагодено на различен пристап кон исхраната, со цел полесно да го откриете моделот што најмногу му одговара на вашето тело:

• Првото мени е без глутен - оброците содржат само безглутенски житарици.
• Второто мени е без лактоза – оброците не содржат млечни производи.
• Третото мени е со балансирани и разновидни оброци, креирано да прикаже како изгледа исхрана во која не се исклучуваат ниту глутенот ниту лактозата, но и понатаму останува нутритивно квалитетна. Менито вклучува оброци богати со антиоксиданси, квалитетни протеини и здрави масти, со што дава силна поддршка не само за тироидното здравје, туку и за општото физичко и ментално благосостојба.

Ваквиот пристап покажува дека балансираната исхрана може да биде и флексибилна и функционална – без непотребни рестрикции, но со јасна структура и нутритивен фокус.

Овие менија се замислени како рамка и насока за тоа како може да изгледа разновидна, балансирана и нутритивна исхрана што ја поддржува тироидната функција. Не мора строго да се придржувате до нив, важно е да ги разберете принципите и да ги приспособите оброците и храната според вашите потреби, навики и цели. Менито е тука пред сѐ како инспирација, не како правило.

• Земете го Еутироксот 30–60 минути пред појадок.
• Избегнувајте намирници богати со железо и калциум во појадокот, а ако пиете суплементи со овие додатоци, почекајте минимум 4 часа по терапијата.
• Вклучете повеќе свежа храна со антиинфламаторни својства.
• Не претерувајте со растителни влакна, тие се неопходни, но во големи количини може да попречат не само во апсорпција на Еутирокс, туку и на други нутриенти.

Иако менијата се внимателно структурирани, тие дозволуваат флексибилност. Тоа значи дека и со мали отстапки не се губи ефектот, сѐ додека ги следите клучните правила: време на внес, комбинација на намирници и нутритивен фокус.

Во целокупниот пристап кон тироидниот дисбаланс, исхраната игра клучна улога, но не е единствениот фактор што прави разлика. Подеднакво важна е и физичката активност. Умерената, редовна физичка активност го засилува антиинфламаторниот ефект на исхраната, го намалува нивото на стрес и лачењето на кортизол, кој ако е хронично покачен, може негативно да влијае врз синтезата и регулацијата на тироидните хормони. Движењето придонесува за подобар метаболизам, поквалитетен сон и општо подобро психофизичко функционирање.

Затоа е многу важно целиот процес да го започнете со смиреност и разбирање, ова не е болест, туку состојба со која се учи да се живее. Наместо да го гледате ова како нешто што „мора“, погледнете го како избор што го правите за себе. Со правилен пристап, исхраната и рутината не се ограничување, туку извор на стабилност, енергија, мир, повеќе здравје и поквалитетен живот.